ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿ ԵՆԹԱԿԱՌՈՒՑՎԱԾՔՆԵՐԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅՈՒՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿ ԵՆԹԱԿԱՌՈՒՑՎԱԾՔՆԵՐԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅՈՒՆ
Սեպտեմբերի 25-ին ՀՀ էներգետիկայի և բնական պաշարների նախարար Երվանդ Զախարյանը հյուրընկալեց KfW բանկի (Վերականգնման վարկերի բանկ) պատվիրակության անդամներ՝ ԳԴՀ տնտեսական համագործակցության և զարգացման նախարարության վարչության պետ Դիրկ Շատշնայդերին, նույն նախարարության ներկայացուցիչներ՝ Կլաուս Տանցբերգերին և Աննա Կատարինա Դերկորնին, ինչպես նաև KfW բանկի տարածաշրջանային ղեկավար Դեյվիդ Բետոլացային և բանկի գլխավոր համակարգող Բելլա Անդրիասյանին:
Ողջունելով ներկաներին՝ նախարարը շնորհակալություն հայտնեց Գերմանիայի կառավարությանը և KfW բանկին Հայաստանի էներգետիկ բնագավառում իրականացվող ծրագրերին ցուցաբերած աջակցության համար։ Ե. Զախարյանը միաժամանակ նշեց, որ հաջողությամբ ընթանում են KfW բանկի ֆինանսավորմամբ իրականացվող Հայաստան-Վրաստան 400 կՎ էլեկտրահաղորդման գծի կառուցման աշխատանքները, ընդգծեց ծրագրի նշանակությունը էլեկտրաէներգետիկ համակարգերի տարածաշրջանային ինտեգրման գործում:
Իր հերթին` ԳԴՀ տնտեսական համագործակցության և զարգացման նախարարության վարչության պետ Դիրկ Շատշնայդերը կարևորելով հետագա համագործակցությունը՝ նպատակահարմար համարեց ընթացիկ աշխատանքներից բացի ծրագրեր իրականացնել նաև վերականգնվող էներգետիկայի և էներգախնայողության ոլորտում: Նախարարը հայտնեց հայկական կողմի պատրաստակամությունը։
Հանդիպման ժամանակ հյուրերին ներկայացվեց նաև Հայաստանի էներգետիկ համակարգի զարգացման հետագա ռազմավարությունը: