Քննարկվել է Իրան-Հայաստան բարձրավոլտ էլեկտրահաղորդման գծի կառուցման ընթացքը

ՀՀ էներգետիկ ենթակառուցվածքների և բնական պաշարների  նախարար Արթուր Գրիգորյանը օգոստոսի 8-ին ընդունել է Հայաստանի Հանրապետությունում  Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադին ու  Հայաստան-Իրան 400 կՎ էլեկտրահաղորդման  գծի կառուցման ծրագրի գլխավոր կապալառու «Սանիր» ընկերության  ներկայացուցիչներին:

Զրուցակիցները քննարկել են էներգետիկ ոլորտում երկկողմ և տարածաշրջանային համագործակցության  հնարավորություններն ու հեռանկարները։ Այդ համատեսքտում անդրադրաձ է եղել Իրան-Հայաստան բարձրավոլտ էլեկտրահաղորդման երրորդ գծի կառուցման ընթացքին, մասնավորապես՝ կապալառուի կողմից  աշխատանքները  պատշաճ և սահմանված ժամանակացույցին համապատասխան  իրականացնելուն:

Դեսպանը նշել է, որ էլեկտրահաղորդման գծի կառուցումը  կխթանի «Հյուսիս-Հարավ էլեկտրաէներգետիկական միջանցք»-ի (Հայաստան-Վրաստան-Իրան-Ռուսաստան)  քառակողմ նախաձեռնության իրագործմանը:

Արթուր Գրիգորյանն իր  հերթին կարևորել է  համագործակցությունը քառակողմ ձևաչափով ընդլայնելու անհրաժեշտությունն ու ընդգծել, որ նախարարությունը պատրաստակամ է գործադրել առավելագույն ջանքերը ծրագիրը կյանքի կոչելու համար: