Ամենայն Հայոց Կաթողիկոսն ընդունեց ՀՀ էներգետիկ ենթակառուցվածքների և բնական պաշարների նախարարին

Հունիսի 1-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանին:

Շնորհավորելով վերանշանակման առիթով` Վեհափառ Հայրապետն իր բարեմաղթանքներն ու օրհնությունը բերեց պարոն Աշոտ Մանուկյանին` հայցելով, որ Տերը շնորհազարդի և զորացնի նրան` իր պարտականություններն արդյունավետ կերպով իրականացնելու` ի նպաստ հայրենիքի շինության և առաջընթացի:

Զրույցի ընթացքում խոսվեց Մայր Աթոռ Ս. Էջմիածնի կողմից իրականացվող տարբեր սոցիալական, բարեգործական, ինչպես նաև բնապահպանական ծրագրերի մասին:

Այս առնչությամբ անդրադառնալով Մայր Աթոռի տարածքում կառուցվող արևային ֆոտովոլտային կայանին, նախարարը նշեց, որ այն առաջիններից մեկը կլինի Հայաստանում: Կարևորելով Սուրբ Էջմիածնի կողմից ձեռնարկված քայլը բնապահպանական առումով` նա ընդգծեց նաև, որ այս ուղղությամբ Մայր Աթոռի հետ համագործակցությունը շարունակական բնույթ կունենա:

Հանդիպմանը ներկա էր Մայր Աթոռի վարչատնտեսական բաժնի տնօրեն Գերաշնորհ Տ. Մուշեղ եպիսկոպոս Բաբայանը: