Նախարարը հյուրընկալել է հանքարդյունաբերության ոլորտի ներկայացուցիչներին

ՀՀ էներգետիկ ենթակառուցվածքների և բնական պաշարների նախարարությունում այսօր` դեկտեմբերի 26-ին նախարար Աշոտ Մանուկյանը հյուրընկալել է  հանքարդյունաբերության ոլորտի ներկայացուցիչներին։ Նախարարը շնորհակալություն է հայտնել ոլորտի ներկայացուցիչներին՝ դժվարին ու պատասխանատու աշխատանքի համար, շնորհավորել  Ամանորի և Սուրբ Ծննդյան տոների  առթիվ՝ մաղթել  առողջություն, երջանկություն և հաջողություններ:

  -Ընդերքն այն եզակի ոլորտներից  է, որն ունի  զարգացման  վիթխարի ներուժ: Վստահ եմ, որ 2017 թվականին կկարողանանք  այդ ներուժն ամբողջությամբ իրացնել, ընդերքի ոլորտը դարձնել այն շոգեքարշը, որն էներգետիկայի հետ համատեղ մեր երկրի տնտեսությունը կքաշի դեպի զարգացում և առաջընթաց։ Կառավարության ծրագրերը  ընդերքի  ոլորտի հետ կապված իսկապես հավակնոտ են, և մենք  պարտավոր ենք  իրականացնել մեր առջև դրված պարտականությունները, - ասել է Աշոտ Մանուկյանը:

  Նախարաը  ընդերքի ոլորտում երկարամյա օրինակելի ու անբասիր աշխատանքի համար Հայաստանի Հանրապետության էներգետիկ ենթակառուցվածքների և բնական պաշարների նախարարի «Հայաստանի Հանրապետության ընդերքի բնագավառում նշանակալի ավանդի համար» հուշամեդալով խրախուսել է երկրաբան, կենսաթոշակառու Ալբերտ Մաթևոսյանին, «Զանգեզուրի պղնձամոլիբդենային կոմբինատ» ՓԲԸ-ի լեռնային արտադրամասի էքսկավատորային տեղամասի  էքսկավատորավար Արամայիս Համբարձումյանին, «Մեղրաձոր Գոլդ» ՍՊԸ-ի լեռնային տեղամասի պետ Պավլիկ Խաչատրյանին, «Ագարակի պղնձամոլիբդենային կոմբինատ»  ՓԲԸ-ի լեռնային արտադրամասի հորատման հաստոցի մեքենավար Գրիգոր Օհանջանյանին:

  Հայաստանի հանքագործների և մետալուրգների միության ոսկե մեդալով  պարգևատրվել է ՀՀ էներգետիկ ենթակառուցվածքների և բնական պաշարների նախարարության աշխատակազմի  Օգտակար  հանածոների պաշարների գործակալության բաժնի պետ Հրանտ Ավետիսյանը: