Հանրային քննարկում Էներգետիկ ենթակառուցվածքների և բնական պաշարների նախարարությունում

ՀՀ էներգետիկ ենթակառուցվածքների և բնական պաշարների նախարարությունում նոյեմբերի 18-ին անցկացվեց հանրային քննարկում՝ ընդերքօգտագործման թափոնների և դրանց գործածության օբյեկտների կառավարման հետ կապված իրավահարաբերությունները կարգավորելու նպատակով ընդունված օրենքների վերաբերյալ: Քննարկմանը  մասնակցեցին Բնապահպանության նախարարաության,  հասարակական կազմակերպությունների, գիտական  և  ուսումնական  հաստատությունների  ներկայացուցիչներ:

ՀՀ էներգետիկ ենթակառուցվածքների և բնական պաշարների նախարարի տեղակալ  Վարդան Գևորգյանը  շնորհակալություն  հայտնելով քնարկման  մասնակիցներին հրավերն  ընդունելու համար, նշեց,  որ պատրաստ են լսել և հաշվի  առնել շահագրգիռ կողմերի կառուցողական առաջարկները:

Վ. Գևորգյանը տեղեկացրեց, որ  օրենդրական փոփոխությունները իրականացվել  են  Համաշխարհային բանկի աջակցությամբ  և  Բնապահպանության նախարարության  մասնակցությամբ: Փորձ է  արվել կարգավորել շրջակա  միջավայրի  և  մարդու  առողջության հետ կապված խնդիրները:

Ներկայացնելով «Ընդերքի մասին օրենսգրքում», «Թափոնների մասին» «Բնապահպանական և  բնօգտագործման վճարների մասին» ՀՀ օրենքներում լրացումներ կատարելու անհրաժեշտությունը, ՀՀ էներգետիկ ենթակառուցվածքների և բնական պաշարների նախարարության օգտակար հանածոների և ընդհանուր երկրաբանության  բաժնի պետ Շուշանիկ Քերոբյանը, ընգծեց, որ դա պայմանավորված է օրենսդրական դաշտում առկա չլուծված՝ ընդերքօգտագործման թափոնների և դրանց գործածության օբյեկտների կառավարման հարցերը կարգավորելու  և հստակեցնելու նպատակադրումով: Օրենսգրքում «ընդերքօգտագործում» հասկացության մեջ ներառվել է նաև ընդերքօգտագործման թափոնների վերամշակումը: Սակայն դրա   համար լրացուցիչ թույլտվություն տալու անհրաժեշտություն չի լինի, քանի որ այն հանդիսանալու է օգտակար հանածոի արդյունահանման թույլտվության մաս:

Շուշանիկ Քերոբյանի խոսքով՝ ընդերքօգտագործողները հանքի շահագործման ընթացքում և փակումից հետո պարտավոր են իրականացնել  ընդերքօգտագործման թափոնների կառավարման, իսկ օրենսգրքով նախատեսված դեպքերում ընդերքօգտագործման թափոնների վերամշակման պլաններով նախատեսված միջոցառումներ` շրջակա միջավայրին կամ մարդկանց առողջությանը հասցվող վնասը և վթարները կանխարգելելու, նվազագույնի հասցնելու նպատակով:

Հանդիպման  ընթացքում տեղի ունեցավ շահագրգիռ քննարկում: Մասնակիցները  բարձրացրեցին իրենց հուզող հարցերը և նկատառումները:

Պայմանավորվածություն  ձեռք  բերեվեց՝ հնչեցված հարցերի վերաբերյալ առաջարկությունները գրավոր ներկայացնել ՀՀ էներգետիկ ենթակառուցվածքների և բնական պաշարների նախարարություն՝ ևս մեկ անգամ քննարկելու և օրենսդրական առաջիկա  փոփոխություններում հաշվի  առնելու համար: