Ռադիոակտիվ հումքի ընդերքօգտագործման իրավունքը կտրամադրվի մրցութային կարգով

   Ռազմավարական նշանակություն ունեցող՝ ռադիոակտիվ հումքի երկրաբանական ուսումնասիրության ընդերքօգտագործման իրավունքը նախատեսվում է տրամադրել մրցութային կարգով։ Այդ նպատակով սեպտեմբերի 29-ին կայացած նիստում կառավարությունը հավանություն տվեց <Ընդերքի մասին> ՀՀ օրենսգրքում լրացումներ կատարելու վերաբերյալ ՀՀ էներգետիկայի և բնական պաշարների նախարարության կողմից ներկայացված օրենսդրական նախաձեռնությանը։

   Ներկայումս գործող <Ընդերքի մասին> օրենսգրքով բոլոր տեսակի օգտակար հանածոների համար սահմանված է ընդերքօգտագործման իրավունքի տրամադրման միևնույն ընթացակարգը: Այն որևէ կերպ չի կարգավորում ռադիոակտիվ հումքի (որպես ռազմավարական նշանակություն ունեցող հումք) երկրաբանական ուսումնասիրության նպատակով  ընդերքօգտագործման իրավունքի տրամադրման հետ կապված իրավահարաբերությունները:

   Ռադիոակտիվ հումքի երկրաբանական ուսումնասիրությունների իրավունքը մրցութային կարգով տրամադրելը հնարավորություն կտա կազմակերպությանը ընտրելիս հաշվի առնել վերջինիս` ըն­դերքօգ­տա­գործման ոլորտում ունեցած նմանատիպ աշխատանքների փորձը, ընդերքօգտագործման առաջարկվող ծրա­գիրը, նորագույն մեթոդների և տեխնոլոգիաների  կիրառումը, միջազգային փորձի հաշվառումը, նախա­տես­վող ներ­դրում­ների ծավալը, ստեղծվելիք աշխատատեղերի քանակը, մրցույթի մասնակիցների կողմից առաջարկվող՝ աշխատանքների կատարման ընթացքում շրջակա միջավայրի պահպանության, բնակչության առողջության անվտանգության և տեխնիկական անվտանգության ապահովման ուղղությամբ ձեռնարկվելիք միջոցառումները, մրցույթի մասնակիցների որակավորումը, ֆինանսական և տեխնիկական կարողությունները: