Նախարարը հյուրընկալել է Հայաստանում Գերմանիայի նորանշանակ դեսպանին

Հոկտեմբերի  21-ին ՀՀ էներգետիկայի և բնական պաշարների նախարար Երվանդ Զախարյանը հյուրընկալել է ՀՀ-ում Գերմանիայի Դաշնային Հանրապետության նորանշանակ արտակարգ և լիազոր դեսպան Մաթիաս Քիսլերին:

Նախարարը շնորհավորել է դեսպանին պաշտոնում  նշանակվելու կապակցությամբ  և մաղթել բեղմնավոր ու  արդյունավետ աշխատանք՝ դիվանագիտական առաքելությունն իրականացնելու ընթացքում:

Հանդիպման ժամանակ նախարարը ներկայացրել է Հայաստանի էներգետիկ համակարգի ներկա վիճակն ու զարգացման հեռանկարները:

Երվանդ Զախարյանը շնորհակալություն է  հայտնել ԳԴՀ կառավարությանը Հայաստանի էներգետիկայի բնագավառում ցուցաբերած աջակցության համար և նշել, որ հաջողությամբ ընթանում են KfW բանկի ֆինանսավորմամբ իրականացվող Հայաստան-Վրաստան 400 կՎ էլեկտրահաղորդման գծի կառուցման աշխատանքները:

Զրուցակիցները քննարկել են նաև երկկողմ համագործակցության ընդլայնման հնարավորություններն ու հեռանկարները, մասնավորապես՝ վերականգնվող էներգետիկայի բնագավառում:

Դեսպան Մաթիաս Քիսլերը շնորհակալություն է հայտնել ջերմ ընդունելության համար և պատրաստակամություն հայտնել շարունակել սերտ համագործակցությունը: