Տորոնտոյում կայացել է հանքարդյունաբերության ամենամյա միջազգային համաժողովը

ՀՀ էներգետիկայի և բնական պաշարների նախարար Երվանդ Զախարյանը մարտի 1-3-ը Տորոնտոյում մասնակցել է հանքարդյունաբերության ոլորտի ամենամյա միջազգային համաժողովին: Համաժողովին յուրաքանչյուր տարի մասնակցում է 100 երկրների շուրջ  25 հազար ներկայացուցիչ՝ հանքարդյունաբերության ոլորտի համաշխարհային դերակատարներ, բնագավառի քաղաքականությունը մշակողներ, ներդրողներ, ֆինանսավորողներ, արդյունահանողներ և վերամշակողներ:

            Տորոնտոյի համաժողովի հիմնական նպատակն է բնական պաշարների ոլորտում խթանել նոր գործարար ուղիներ՝ Կանադայի և Եվրասիական տարածաշրջանի երկրների միջև: Համաժողովը միաժամանակ հիանալի հնարավորություն է մասնակից երկրների համար  ներկայացնել  ընդերքի ոլորտում ունեցած հնարավորություններն ու առաջարկները:

            Համաժողովին ելույթ է ունեցել նաև ՀՀ էներգետիկայի և բնական պաշարների  նախարար Երվանդ Զախարյանը: Նախարարն իր ելույթում ներկայացրել է Հայաստանի  ընդերքի ոլորտի քաղաքականությունը, օրենսդրական դաշտը,  բնագավառի ընթացիկ իրավիճակն ու զարգացման հեռանկարները:

Երվանդ Զախարյանը համաժողովի շրջանակներում հանդիպումներ է ունեցել հանքարդյունաբերության բնագավառի մի շարք ընկերությունների, այդ թվում՝ Հայաստանում գործունեություն ծավալող "Dundee Precious Metals", "Lydian International",  “Centerra Gold inc” ընկերությունների ղեկավարների հետ:

Քննարկվել են Հայաստանի հանքարդյունաբերության ոլորտում ներդրումների ներգրավման և գործունեության ընդլայնման հետ կապված հարցերը:

Նախարարը մասնակցել է նաև համաժողովի շրջանակներում կազմակերպված հանքարդյունաբերության ցուցահանդեսին: