Ստորագրվեց Որոտան ՀԷԿ-երի գույքի առուվաճառքի պայմանագիրը

Ստորագրվեց Որոտան ՀԷԿ-երի գույքի առուվաճառքի պայմանագիրը

Հունվարի 29-ին, ՀՀ կառավարությունում, էներգետիկայի և բնական պաշարների նախարար Արմեն Մովսիսյանը, ամերիկյան <Քոնթուր գլոբալ հիդրոկասկադ> ընկերության փոխնախագահ Գարի Լիվսլին, <Որոտան հիդրոէլեկտրակայանների համալիր» ՓԲԸ-ի  տնօրեն Սասուն Խաչատրյանը ստորագրել են <Որոտան հիդրոէլեկտրակայանների համալիր>-ի գույքի առուվաճառքի պայմանագիրը`  180 մլն դոլար ընդհանուր արժողությամբ։ Պայմանագրի համաձայն <Քոնթուր գլոբալ հիդրոկասկադ> ընկերությունը, առաջիկա 6 տարիների ընթացքում, <Որոտան հիդրոէլեկտրակայանների համալիր>-ի արդիականացման և վերանորոգման համար պետք է ներդնի շուրջ 70 մլն դոլար: Կապիտալ ներդրումների և ծախսերի ծրագիրը նախապես կքննարկվի և կհամաձայնեցվի Հանրային ծառայությունները կարգավորող հանձնաժողովի /ՀԾԿՀ/ հետ։ Հանձնաժողովը հաստատել է նաև այն սակագնային պլանը, որի համաձայն ընկերությունը կապահովի մոտակա 25 տարիների ընթացքում Որոտան համալիրի անխափան և շարունակական շահագործումը:

Պայմանագրի ստորագրումից հետո ՀՀ էներգետիկայի և բնական պաշարների նախարար Արմեն Մովսիսյանն ասել է, որ  <Որոտան հիդրոէլեկտրակայանների համալիրը> պետք է շահագործի այնպիսի ընկերություն, որը հիդրոէներգետիկ ոլորտում աշխատելու բավարար փորձ ունի:

- <Որոտանի> ՀԷԿ-երի համալիրը մոտ 40 տարվա պատմություն ունի, ինչը նման կայանների համար բավական մեծ տարիք է: Կայանը արդիականացնելն ու վերազինելն ուղղակի անհրաժեշտություն էր դարձել, իսկ դա նշանակում է բավական մեծ ներդրումներ կատարել,- ասել է Ա.Մովսիսյանը: - <Քոնթուր գլոբալ հիդրոկասկադ> ընկերությունը հենց այն ընկերությունն է, որն ունի և' բավարար փորձ, և' ֆինանսական հնարավորություններ, որոնք անհրաժեշտ են ներդրումներ կատարելու և կայանը ժամանակակից  տնտեսական և տեխնոլոգիական պահանջներին համապատասխանեցնելու համար: