ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿ ԵՆԹԱԿԱՌՈՒՑՎԱԾՔՆԵՐԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅՈՒՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿ ԵՆԹԱԿԱՌՈՒՑՎԱԾՔՆԵՐԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅՈՒՆ
Երևանում ստորագրվեց «Կայուն էներգիայի ոլորտին ուղղված գործողությունների ծրագիր» փոխըմբռնման հուշագիրը
Վերակառուցման և զարգացման եվրոպական բանկի (ՎԶԵԲ)` Թուրքիայի, Արևելյան Եվրոպայի, Կովկասի և Միջին Ասիայի գծով գլխավոր տնօրեն Օլիվյե դե Կամպը և Էներգետիկայի և բնական պաշարների նախարար Արմեն Մովսիսյանն այսօր ստորագրեցին «Հայաստանում կայուն էներգիայի ոլորտին ուղղված գործողությունների ծրագրի» վերաբերյալ փոխըմբռնման հուշագիրը:
Այս նախաձեռնության նպատակն է օգնել Հայաստանին նվազեցնելու երկրի տնտեսության էներգատարողության մակարդակը և սատարել էներգաարդյունավետությանն ուղղված ներդրումների իրականացմանը տնտեսության տարբեր հատվածներում.
օրինակ՝ էլեկտրականության և էներգիայի, արդյունաբերության, գյուղատնտեսության, համայնքային և բնապահպանական ենթակառուցվածքների, անշարժ գույքի, ինչպես նաև բնակարանային ոլորտներում:
«Կայուն էներգիայի ոլորտին ուղղված գործողությունների ծրագիրը», որը մշակվել է Էներգետիկայի և բնական պաշարների նախարարության և ՎԶԵԲ-ի հետ համատեղ, կարևոր քայլ է սատարելու Հայաստանի էներգետիկ հատվածի հետագա զարգացմանը և ապահովելու կայուն էներգիայի աղբյուրներից էներգիայի երկարաժամկետ մատակարարումը:
Հատուկ ուշադրություն կդարձվի արդյունաբերական և բնակարանային ոլորտներում էներգաարդյունավետության մակարդակի բարձրացմանը, ինչը կօգնի հայաստանյան ընկերություններին և տնային տնտեսություններին նվազեցնել էներգիայի սպառումն ու ծախսերը:Այս նախաձեռնությունը կարող է նաև աջակցել Հայաստանին` ՀԷԿ-երի զարգացման իր մեծ ներուժը օգտագործելու առումով:
«Հայաստանում «Կայուն էներգիայի ոլորտին ուղղված գործողությունների ծրագիրը» կօժանդակի Հայաստանի կառավարությանը՝ մշակելու էներգաարդյունավետությանն ուղղված ներդրումների համար անհրաժեշտ օրենսդրությունը, զարգացնելու ֆինանսավորման նախաձեռնություններ, աջակցելու էներգաարդյունավետության և վերականգնվող էներգիայի ոլորտներում ներդրումներին և հնարավոր կարբոն ֆինանսավորմանը», - ասել է Օլիվյե դե Կամպը:
ՎԶԵԲ-ը Հայաստանում ամենամեծ ներդրողներից է: 1992թ. այստեղ՝ իր գործունեության մեկնարկից ի վեր, ՎԶԵԲ-ն ավելի քան 516 մլն եվրո է ներդրել երկրի ֆինանսական, կորպորատիվ, էներգետիկ և ենթակառուցվածքների ոլորտներում իրականացվող 106 ծրագրերում: