Թեհրանում տեղի ունեցավ ՀՀ և ԻԻՀ միջկառավարական հանձնաժողովի հերթական նիստը

Թեհրանում տեղի ունեցավ  ՀՀ և ԻԻՀ միջկառավարական հանձնաժողովի հերթական նիստը

Մայիսի 29-30-ը Թեհրանում տեղի ունեցավ Հայաստանի Հանրապետության և Իրանի Իսլամական Հանրապետության միջկառավարական համատեղ հանձնաժողովի հոբելյանական  տասներորդ  նիստը, որին մասնակցելու համար Իրան էր մեկնել ՀՀ էներգետիկայի և բնական պաշարների նախարար, Հայ-իրանական միջկառավարական  հանձնաժողովի  համանախագահ Արմեն Մովսիսյանի գլխավորած պատվիրակությունը: ԻԻՀ պատվիրակությունը ղեկավարում էր հանձնաժողովի իրանական կողմի համանախագահ, Իրանի Իսլամական Հանրապետության արտաքին գործերի նախարար Ալի Աքբար Սալեհին:

Համատեղ նիստն անցավ փոխըմբռնման մթնոլորտում: Աշխատանքային խմբերի բանակցությունների և քննարկումների արդյունքում  կողմերը պայմանավորվածություններ ձեռք բերեցին էներգետիկայի և ջրային պաշարների, առևտրի և արդյունաբերության, տրանսպորտի և հաղորդակցության, բանկային և ապահովագրական, գյուղատնտեսության, զբոսաշրջության, առողջապահության, քաղաքաշինության, արտակարգ  իրավիճակների,  միջնահանգային  համագործակցության, դատաիրավական,  արխիվային,  աշխատանքի և սոցիալական հարցերի բնագավառներում համագործակցությունները զարգացնելու, նախկինում ձեռք բերված պայմանավորվածությունները և նախագծերը իրականացնելու հարցերի շուրջ:

Համատեղ նիստի շրջանակներում Հ Հ էներգետիկայի և բնական պաշարների նախարար, Հայ-իրանական միջկառավարական հանձնաժողովի նախագահ Արմեն Մովսիսյանը հանդիպումներ և բանակցություններ ունեցավ ԻԻՀ ԱԳ նախարար Ալի Աքբար Սալեհիի, ԻԻՀ էներգետիկայի նախարար Մաջիդ Նամջուի, ԻԻՀ նավթի նախարարի տեղակալների, ԻԻՀ տրանսպորտի նախարարի տեղակալի հետ : Համատեղ հանձնաժողովի նիստի ավարտից հետո տեղի ունեցավ Հայաստանի Հանրապետության և Իրանի Իսլամական Հանրապետության միջկառավարական համատեղ հանձնաժողովի  10-րդ  նիստի մասին Փոխըմբռնման հուշագրի ստորագրման արարողությունը :

Այցի ավարտին Արմեն Մովսիսյանին ընդունեց  ԻԻՀ նախագահ Մահմուդ Ահմադինեժադը: