ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿ ԵՆԹԱԿԱՌՈՒՑՎԱԾՔՆԵՐԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅՈՒՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿ ԵՆԹԱԿԱՌՈՒՑՎԱԾՔՆԵՐԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅՈՒՆ
Էներգետիկայի և բնական պաշարների նախարար Արմեն Մովսիսյանը հունիսի 22-ին հանդիպեց լրագրողների այն խմբի հետ, ովքեր այցելել էին Սյունիքի մարզի Լեռնաձոր գյուղ, որտեղ իրականացվում են ուրանի պաշարների ուսումնասիրության աշխատանքներ:Նախարարը պատասխանեց այդ աշխատանքներին վերաբերող բոլոր հարցադրումներին:Ինչպես հայտնի է, բնապահպանական մի շարք կազմակերպություններ ու Լեռնաձորի բնակչությունը տագնապի մեջ են ուրանի պաշարների հնարավոր շահագործումից:
Նախարարը մանրամասն բացատրեց, որ դեռ պետք է պարզվի այդ տարածքում ուրանի գոյությունը։ Դրանից հետո պետք է մասնագիտական լուրջ աշխատանք կատարվի, հասկանալու համար, թե ի՞նչ ծավալի ուրան կա Լեռնաձոր գյուղի մերձակայքում, և եթե կա, ապա այդ ծավալը արդյունահանման տեսակետից որևէ հետաքրքրություն ներկայացնում է թե ոչ։ Արմեն Մովսիսյանը մի քանի անգամ շեշտեց, որ նշված հարցերի պատասխանը կարելի է ստանալ միայն երկրաբանահետախուզական աշխատանքների, փորձնական (հետախուզական) հորատանցումների միջոցով, ինչն էլ արվում է այս փուլում: Նա վստահեցրեց որ այդ հորատումները ռադիացիոն վտանգ չեն ստեղծում և Լեռնաձորի բակչությանը, կենդանական ու բուսական աշխարհին որևէ վնաս չեն պատճառում: Նախարարը տեղեկացրեց նաև, որ տվյալ տարածքում ռադիացիոն ֆոնը մշտական հսկողության տակ է, գտնվում է նորմայի սահմաններում ու չի գերազանցում 16 միլիռենտգենը: Արմեն Մովսիսյանը հերքեց նաև այն մտավախությունը, թե իբր այդ աշխատանքները բնակավայրի գրունտային ջրերի ռադիացիոն աղտոտման պատճառ են դառնում.
-Այդ տարածքը ստորերկյա ջրերից զերծ տարածք է: Ինչ խորությամբ էլ ծակեք` ջուր չեք գտնի,- վստահեցրեց նախարարը: